EL NOVO
di Toni Dittura
Ogni tanto, ma de raro,
qualche novo riva in coro
e i coristi, ve ze ciaro,
i lo acoglie co decoro:
i ghe mostra simpatia
e co gran curiosità
i scomete quala che sia
la probabile so età.
Si, ... parchè, lo savè tuti,
(la ze quasi na tragedia)
de tre giorni e do minuti
el riduse l'età media
solo se el ze soto i quaranta.
Ed alora ze importante
de sentir come che el canta:
co un bel voson tonante,
e co vose tenorile,
se el ga un timbro beo robusto
o piutosto feminile
per cantare "di buon gusto" ...
Dopo qualche dì de prove
sona forte la frase vecia:
"Se no femo cante nove,
qualchidun ghe canta in recia!"
Na persona inteligente
qualcosseta pur impara,
ma no 'l progredisse gnente
se no i ghe la canta ciara.
E se ancùo ghe canta Cleto
e doman ghe canta Toni,
le so rece, poareto,
le deventa do tromboni ...
Ma se cante nove e vece
intonàe co gran amor
no rimbomba ne le rece
ma le va’ direte al cuor ...
ze più fassile che 'l novo
presto e ben se fassa onor.