racconto
autobiografico di Toni Dittura
(in ricordo
dell’amico Renato Mazzavillani)
Gavevimo
deciso, mi e Renato
de far na caminada
in Valsugana;
el terso gera Giani
Fortunato,
che aveva insistìo
na setimana
de
andar sul Grapa, partendo da Bassan,
passando par
Solagna e par Roman.
Cussì,
par contentarlo, ‘na matina
partimo
par sta bela scarpinada:
gera
seren e un’aria frissantina
sugava
la me solita suada.
Ma
… in t’un momento orendi nuvoloni
s’ha messo a
brontolar co’ forti toni.
E
dopo i toni ze vegnìo i scravassi
de piova fissa da
lavar la schiena;
camisa e braghe
gera ormai dei strassi
petai su par le
gambe … da far pena!
Co’ quatro
stechi e un “trenc” de gabardin
gavemo improvvisá
un bel baldachìn.
Però la piova lo
impiniva in boto
e bastava intacarse
su pai rami
che
tuto se svodava e nu, de soto
fassevimo
la docia … pori grami!
Come
che ga volesto el Padreterno
Gavemo resistio in
te quell’inferno.
E
passo passo, co la lingua fora
semo
entrai dentro i nuvoloni neri;
el
pareva caligo! Ma in t’ un’ora ,
quasi
corendo come dei levrieri,
le
nuvole gavemo oltrepassà
e … semo
restai tuti sensa fià!
El
sol splendeva sora delle vete
sbiancando
un mar de nuvole d’intorno;
qua
e là spuntava come dele isolete
do,
tre coline … Gera mesogiorno!
De
soto sto bombaso de vapor
ne ze vegnìo na
bota … drita al cuor!
Dindin,
dindin fasseva na campana;
dondorodon
un campanon incerto,
e
in tre minuti tuta la Valsugana
de
mile din don dan gera un concerto!
Mi,
Giani e Renato, imbambolai
no se gavemo più
sentìo bagnai!
Se
ghemo vardà intorno a boca verta;
gerimo
s’un prà grando, tuto bianco,
ma
no de neve! La gera na coverta
de
tanti fiori … tre miliardi almanco!
Ne
pareva de star in Paradiso.
Quel
giorno gera “La festa del Narciso”!